• 01-1.gif
  • 01-1.jpg
  • 01-2.jpg
  • 01-3.jpg
  • 01-4.jpg
  • 01-5.jpg
  • 01-6.jpg
  • 01-7.jpg
  • 01-8.jpg
  • 01-9.jpg
  • 01-10.jpg
  • 01-11.jpg
  • 01-12.jpg
  • 01-13.jpg
  • 6c500738-1d97-4a22-83a4-e04791779239.jpg
  • 76acbc71-b2d4-4b27-b205-1b5e8a4c34f4.jpg
  • 200x300.jpg
  • 67631529-238d-4696-a33f-f18073f908c7.jpg
  • AEYQ3461.JPG
  • b9a82320-a85a-4752-9247-dae0111174cb.jpg

صفحة المتحدث الرسمي بإسم الكنيسة القبطية الارثوذكسية

اذاى اعيش صوم العدرا بطريقه مختلفه

لازم كل واحد فينا يبقى عارف انه محتاج للصوم ده جدا مش علشان موسم وايام حلوه وذكريات وتماجيد وبس .لكن لاننا فى مرحله روحيه محتاجه نبقى شداد فيها مع نفسنا ونرجع زى ماكنا زمان مع ربنا.. مش عاوزين صوم العدرا السنه دى يعدى انه مجرد صوم فى تماجيد ومدائح حلوه واجواء الصوم اللى بنشوفها فى الشوارع من زينه فى البيوت للعدرا كل دى حاجات جميله ومانقدرش نستغنى عنها ابدا لان ده جزء من تكوينا الروحى .. لكن احنا محتاجين صوم العدرا السنه دى يبقى صوم روحى مختلف
( نهايه الصوم هو صعود جسد العدرا مريم . عاوزين نجاهد ان يكون صومنا الفتره دى هى صعود جسدنا وصعود الجسد ده مش هاينفع غير لما يكون الجسد خفيف مش تقيل وده مش هايجى غير لما الروح تبقى قويه.. عاوزين نجاهد الصوم ده نقوى الروح شويه  ببعض الحاجات نحاول نعملها سوا فى فتره ال 15 يوم دول

1) على اد ماتقدر تحضر قداسات فى الصوم ده وممكن علشان شغلك ووقتك على اد ماتقدر تحضر قداس او اتنين فى الاسبوع او تثبت ان يوم اجازتك لازم تتناول.


2) على اد ماتقدر وحسب ارشاد اب اعترافك تصوم انقطاعى على اد ماتقدر حسب طاقتك بس نحاول.


3) الصوم ده 15 يوم ياريت نقرا كل يوم 10 مزامير هاتلاقى نفسك خلصت سفر المزامير فى صوم العدرا .. وممكن تقسمهم 5 الصبح و5 بليل.


4) تعالوا فى الصوم ده نقرا مع بعض بروح الصلاه رساله بطرس الاولى والثانيه .

واشمعنا دول لانك هاتلاقى فيهم رساله قويه لينا فى الايام دى من ضعفات بتحصل بارادتنا وضعفات بتحصل من غير ارادتنا ولو مش حابب تقرا الرسالتين دول حدد رساله تانيه واقراها بروح الصلاه فى فتره الصوم


5) الست العدرا ام النور رغم انها كانت حامل وتعبانه لكنها كانت بتخدم اليصابات.تعالي فى ال15 يوم دول نتعود رغم الحمل اللى علينا من تعب وهموم وضيق نروح نساعد اى حد محتاج مساعده حتى لو انا تعبان وحامل تعب نروح زى العدرا وهى حامل تحمل تعب اختها .احمل تعب اخوك حتى لو كنت انت تعبان واتسند على النعمه والعدرا هاتقويك.


6) خلى وجودك فى الكنيسه وقت النهضه مش وجود كاقوم عاده. لا صلى من قلبك ارفع قلبك لربنا اتشفع بالعدرا فى كل لحظه . قولها قوينى ساعدينى املى بنورك عينى وقلبى . قولها انتى امى وانا ابنك انا محتاجلك.


7) وقت التمجيد بلاش يبقى التمجيد بالنسبالنا شويه مدائح بنقولها بصوت عالى وتضرب بالدف جامد وتبين جمال صوتك او جمال الكلمات واللحن بتاع التمجيد لا خلى التمجيد يطلع من قلبك  خلى قلبك مشتاق للسما وانت بتقول التمجيد او اى مديحه. ولو شماس وبتضرب دف بلاش تستعرض بضرب الدف لكن خلى قلبك هو اللى يعزف الدف قول قلبى ولحمى يهتفان ويسبحان . ساعتها صدقنى التمجيد هايختلف تماما بالنسبالك.


8) وقت زفه العدرا بلاش يبقى كل همك تاخد بركه من صوره العدرا وتشد فى اللى جنبك وتخبط فيه وتعمل زحمه. وقت الزفه قول يا ست عدرا خلى طيفك يلف على حياتى وقلبى . تعالى بطهرك وعلمينى الطهاره. تعالى بقلبك وعلمينى الخدمه وانكار الذات,, خد كل يوم فضيله من فضائل العدرا ووقت الزفه صلى بيها واطلبها من ربنا تبقى فيك .. ساعتها الزفه بالنسبالك هاتحط جواك روح الفرح الروحى مش الفرح الشكلى.


9) بعد النهضه ماتخلص ماتضيعش وقتك فى الهزار والضحك والوقفه فى الحوش . سلم على الناس وعلى صحابك ووكل حاجه بس ماتضيعش صلاه يوم فى كلام فاضى . خد البركه فى قلبك وروح كل لقمه بسيطه  علشان تعرف تعمل قانونك فى الصوم.


10) صلى للى حواليك وصلى للكنيسه طول ال15 يوم دول
صدقونى لو عرفنا وربنا قدرنا نعمل كده فى ال15 يوم دول حاجات كتير جوانا هاتتغير والخطيه اللى بنعافر فيها هانسود عليها . العدرا حنونه وشفاعتها قويه اوى ..